Forvarnir eru mikilvægur þáttur í því að takast á við vá.  Upplýsingar og leiðbeiningar um forvarnir og viðbrögð við hvers kyns vá er að finna á blaðsíðu 14 í Símaskránni og á heimasíðu Almannavarnadeildar ríkislögreglustjóra, almannavarnir.is.  Almenningur er hvattur til þess að kynna sér leiðbeiningarnar vel.

Almennar leiðbeiningar:
Á heimilum og vinnustöðum ætti fólk að ræða saman um hugsanlegar hættur, ræða tryggingamál, skoða útgönguleiðir hússins og kanna staðsetningu öryggisbúnaðar.  Nám í skyndihjálp er hagnýtt og getur bjargað mannslífum.  Rauði kross Íslands veitir upplýsingar um námskeið fyrir almenning og fyrirtæki.

Mikilvægt er að kunna að meðhöndla öryggisbúnaðinn. Meðal öryggisbúnaðar á heimilum og vinnustöðum ætti að vera: 

• slökkvitæki 
• reykskynjarar 
• brunastigar eða brunakaðlar til undankomu af efri hæðum húsa 
• verkfæri, svo sem hamar, sög, töng, rörtöng, skrúfjárn, skófla, öxi og kúbein

Heppilegt er að koma eftirtöldum búnaði fyrir í viðlagakassa sem allir þurfa að vita hvar geymdur er: 

• sjúkrakassa 
• vasaljósi 
• útvarpi með rafhlöðum 
• bæklingi um skyndihjálp 
• lista yfir mikilvæg símanúmer (nákominna, þjónustuaðila o.fl.) 
• neyðaráætlun fjölskyldunnar/vinnustaðarins

Ræðið og æfið viðbrögð við hættuástandi og látið börn taka fullan þátt í þeim.

Nánari upplýsingar:
Á blaðsíðu 14 í Símaskránni og á almannavarnir.is.