Almannavarnanefnd höfuðborgarsvæðisins var stofnuð í janúar 2004.  Fyrir sameiningu störfuðu þrjár almannavarnanefndir á svæðinu, almannavarnanefnd KMRS (Kjós, Mosfellsbær, Reykjavík og Seltjarnarnes), almannavarnanefnd Kópavogs og sameiginleg almannavarnanefnd Garðabæjar, Hafnarfjarðar og Álftaness.  Nýtt starfsskipulag tók gildi en í því er fjallað um almannavarnanefnd, framkvæmdarráð og aðgerðastjórn.

Almannavarnanefnd (AHS)
Hlutverk almannavarnanefndarinnar er tvískipt, annars vegar utan aðgerða og hins vegar í aðgerðum.  Hlutverk almannavarnanefndar utan aðgerða er: 

• að samræma áhættumat sveitarfélaga fyrir allt svæðið og sjá til þess að það sé endurskoðað reglulega 
• að móta stefnu sem byggð er á áhættumatinu varðandi búnaðarmál og viðbragðsáætlanir

Hlutverk almannavarnanefndar í aðgerðum er: 

• að fjalla um aðgerðir með langtímamarkmið í huga á meðan aðgerðastjórn er að bregðast við þegar orðnum hlutum eða fyrirsjáanlegum á næstu klukkustundum 
• að taka ákvarðanir sem bregða verulega út af fyrirframgerðum viðbragðsáætlunum 
• að taka ákvarðanir sem leiða til hugsanlegra fjárútláta eða sem valda röskun eða óþægindum fyrir íbúana, t.d. um rýmingu stærri svæða í lengri tíma

Hvert sveitarfélag skipar einn aðalmann í nefndina, auk framkvæmdastjóra sveitarfélagsins, og tvo til vara.  Slökkviliðsstjóri og fulltrúi frá Lögreglunni á höfuðborgarsvæðinu sitja einnig í nefndinni.  Framkvæmdastjóri Almannavarnanefndar höfuðborgarsvæðisins er Jón Viðar Matthíasson, slökkviliðsstjóri.
Aðalmenn frá sveitarfélögunum eru nú:  

Jón Gnarr og Dagur B. Eggertsson frá Reykjavík 
Haraldur Sverrisson og Herdís Sigurjónsdóttir frá Mosfellsbæ
Ásgerður Halldórsdóttir og Guðmundur Magnússon frá Seltjarnarnesbæ 
Guðmundur Rúnar Árnason og Hallgrímur Hallgrímsson frá Hafnarfirði 
Pálmi Þór Másson og Kristinn Guðlaugsson frá Álftanesi 
Guðrún Pálsdóttir og Guðríður Arnardóttir frá Kópavogi
Gunnar Einarsson og Erling Ásgeirsson frá Garðabæ 
Guðný G. Ívarsdóttir og Adam Benedikt Burgess Finnsson frá Kjósarhreppi